“The righteous choose their friends carefully, but the way of the wicked leads them astray.” – Proverbs 12:26

Minsan akala natin tunay na kaibigan na pero peke naman pala. Kaya talagang hindi dapat basta-basta magtiwala kasi masakit sa puso at isip pag nagkamali dito – minsan pati sa bulsa. Ang Diyos ang nagbibigay sa’tin ng mga kaibigang maaasahan nang pang-matagalan. Nawa’y ilayo ka Niya sa masamang barkada at ilapit ka Niya sa mga tunay na kaibigan.

Ang Diyos ang nagsasa-ayos ng buhay nating baliko. Minsan din, ginagamit Niya ang mga kaibigan natin para ituwid tayo sa tamang landas.

“The blessing of the LORD brings wealth, without painful toil for it.” -Proverbs 10:22

“S.T.” = Sipag at Tiyaga. Yan ang madalas na sikreto ng mga asensado. Pero talaga bang yun lang ang susi sa tagumpay? Samahan mo pa ng “P” = Pananampalataya. Ang pananampalatayang may kaakibat na aksyon ay makatutulong sa pag-abot ng iyong mga pangarap. Nawa’y magsikap ka ring lumago sa pananampalataya sa Diyos.

S.T.P. = Sipag, Tiyaga, Pananampalataya. Oh, ano pang hinihintay mo? Kilos na!

“Love the Lord your God with all your heart and with all your soul and with all your mind and with all your strength.” -Mark 12:30

Kaya mo bang mahalin ang Diyos ng buong puso, kaluluwa, isip at lakas mo…araw-araw? Eh bawat segundo kaya? Mahirap? Kasi madalas tayong sablay. Hindi nga lilipas ang isang araw na wala tayong kasalanan sa Kanya eh, di ba? Pero sa walang labis at walang kulang na pagmamahal at biyaya ng Diyos, buhay pa tayo ngayon kahit marami tayong atraso sa Kanya. Nawa’y maranasan mo ang lalim at lawak ng pagmamahal ng Diyos sa’yo.

Ang pagmamahal ng Diyos ang dahilan kung bakit tayo marunong magmahal ng ibang tao. Mas lalong dapat natin Siyang mahalin higit sa lahat.

“What no eye has seen, what no ear has heard, and what no human mind has conceived  the things God has prepared for those who love Him.” – 1 Corinthians 2:9

Libre lang naman kaya mangarap ka. Sabayan mo pa ng pananampalataya at pagsisikap. Higit pa sa mga pinakamaganda mong plano ang kayang gawin ng Diyos para sa’yo. Oo, nagkakamali tayo, nagkakasala, pero kung mahal natin ang Diyos at susundin Siya, itutuwid Niya ang landas natin para maging bigger, better, and brighter ang kinabukasan natin kasama Siya. Nawa’y sundan mo ang halimbawa ni Hesus at sundin ang mga aral Niya.

Pinakamainam ang kinabukasan sa patnubay at biyaya ng Diyos.

“Jesus wept.” – John 11:35

Mga kelots…Repapips…Tsong! Sabi ng mga magulang natin dati, hindi daw umiiyak ang mga tunay na lalaki. Ngayong malaki na tayo, alam na natin ang kabulaanan dyan. Bawal ba umiyak? Bakit, wala ba tayong puso? Kung si Hesus nga na Diyos na naging tao ay umiyak din, tayo pa kaya na tao lang? Nawa’y matuto kang ipakita ang totoo mong nararamdaman lalo na sa mga taong mahalaga sa’yo.

Ang pag-iyak ay hindi laging nangangahulugan ng kahinaan. Ang mga tunay na kampeon ay alam din kung paano matalo bago ma-appreciate ang tugatog ng tagumpay.

“The ways of God are without fault.” -Psalm 18:30

Marami tayong hindi alam sa mundong ito at siguradong may mga tanong tayong hindi masasagot hanggang sa ating pagpanaw. Naranasan mo na bang ma-disappoint ng sobra sa mga tao at bagay na inasam mong mangyari? Huwag kang mag-alala kasi may mas maiging plano ang Diyos para sa’yo, bukod sa may dahilan kung bakit nangyari ang hindi dapat mangyari. Nawa’y lubos kang magtiwala sa karunungan at pagmamalasakit Niya sa’yo.

Lord, pinagkakatiwala namin sa inyo lahat dahil Ikaw ang may mas mabuting plano sa’min. Ikaw na, Lord, ikaw na talaga!

“For God so loved the world that He gave His one and only Son, that whoever believes in Him shall not perish but have eternal life.” -John 3:16

Hindi “relihiyon” ang makapagliligtas sa’yo kundi ang “relasyon” mo kay Hesus – ang Daan patungo sa buhay na walang hanggan na nagsisimula na ngayon. Siya ang nagbibigay kulay sa buhay at pinagaganda Niya ang buhay na inilalagak sa Kanya. Nawa’y isuko mo ang buhay mo sa Kanya at isabuhay ang Kanyang mga salita.

Wala nang hihigit pa kung katuwang at kapiling mo sa buhay ang Panginoong Hesus.

“A righteous man may have many troubles, but the Lord delivers him from them all.” -Psalm 34:19

Alam naman nating mahirap manindigan di ba? Lalo na kung mag-isa mong pinaglalaban ang isang bagay. Pero kung nasa katwiran ka…ipaglaban mo! Kasama mo ang Diyos at siguradong ililigtas ka Niya sa kapahamakan. Nawa’y ipagkatiwala mo sa Kanya ang lahat ng bumabagabag sa’yo. Siya ang Makapangyarihang Tagapagligtas mo.

Hindi tayo kailanman iiwan ng Diyos. Siya ang ating Takbuhan at Tagapagtanggol.

“Teach me to do Your will, for You are my God; may Your good Spirit lead me on level ground.” -Psalm 143:10

Mahirap aralin ang tama minsan. Mas madaling lumagay sa mali. Kaya kung gusto mo ang God’s best sa buhay mo, kahit mahirap man sa tingin mo, nawa’y hingin mo sa Diyos na turuan ka Niyang sumunod sa kalooban Niya. Aalalayan ka Niya patungo sa kaganapan ng pangarap Niya sa’yong mas maganda pa sa pinaka-magandang pangarap mo sa buhay mo.

Ang Diyos na pinagmulan ng lahat ng magagandang bagay at tao sa mundo, Siya ang makapagtuturo sa’tin ng karunungang kailangan natin sa buhay.

“No one who hopes in You will ever be put to shame…” -Psalm 25:3a

Naranasan mo na bang maiwan sa ere ng taong sobra mong pinagkakatiwalaan? Masakit isipin at masakit damahin pero hindi maiiwasan. Babaan ang expectation sabi ng iba. Pero ang mas magandang solusyon, sa Diyos ka higit sa lahat umasa dahil hindi ka mapapahiya. Nawa’y lubos kang magtiwala sa patnubay ng Diyos. God knows what’s best.

Dito sa mundo, walang laging sure safe investment pero laging maasahan ang Diyos.